हात्तीपाइले रोगको रोकथामका लागि हात्तीपाइले औषधी खुवाउने अभियानमा ५५ प्रतिशत सहभागी भएको स्वास्थ्य तथा जनसंख्या मन्त्रालय अन्तर्गतको इपिडिमियोलोजी तथा रोग नियन्त्रण महाशाखाले जनाएको छ । मन्त्रालयले संक्रमण जोखिम देखिएका १५ जिल्लामा गत बिहीबारदेखि एकसाथ हात्तीपाइले विरुद्ध औषधी सेवन अभियान सुरु गरेको हो । झापा, मोरङ, धनुषा, महोत्तरी, रौतहट, सर्लाही, बारा, रसुवा, लमजुङ, पर्वत, बाग्लुङ, कपिलवस्तु, बाँके, दाङ, र कैलालीमा भएका ९८ लाख जनसंख्या मध्ये करिव ५४ लाख जनाले औषधी सेवन गरिसकेको महाशाखाका जनस्वास्थ्य अधिकृत रामकुमार महत्तोले बताउनुभयो ।सो अभियान आगामी बिहीबारसम्म जारी रहने जनाइएको छ ।
यसैबीच, मलेरिया रोग तथा लुतो, जुकाको संक्रमणबाट समेत मुत्त हुन सकिने भएकाले हात्तीपाइले रोगको औषधी सेवन महत्वपूर्ण रहेको चिकित्सहरुले बताएका छन् । विश्व स्वास्थ्य संगठनबाट समेत सिफारिस भएको औषधी प्रयोगमा ल्याइएकाले ढुक्क भएर औषधी सेवन गर्न सकिने स्वास्थ्य मन्त्रालयले जनाएको छ । उक्त औषधी दुई वर्ष भन्दा मुनीका बालबालिका, गम्भीर प्रकारका विरामी तथा गर्भवतीका लागि भने सेवन गर्न निषेध गरिएको छ ।
